Gilauman sa Bangko Sentral ng Pilipinas (BSP) nga posibleng “behind the curve” o naulahi na ang bangko sentral sa paghimo og lakang batok sa inflation tungod sa giyera, hinungdan nga gikonsidera ang usa ka “off-cycle” o gawas-sa-iskedyul nga pagsaka sa interest rate.
Matud ni BSP Governor Eli Remolona Jr., dako og kalabotan ang umaabot nga data sa inflation karong Hunyo 5 sa mamahimong desisyon sa Monetary Board sa ilang regular nga tigom karong Hunyo 18, kung diin dako gihapon ang posibilidad nga mopatuman kini og dinalian nga pagsaka sa rates sa dili pa ang maong petsa.
Kini human misaka ngadto sa 7.2 porsiyento ang presyo sa mga palaliton niadtong Abril.
Diin kini giisip nga pinakapaspas nga pagsaka sa sulod sa tulo ka tuig tungod sa kamahal sa enerhiya nga epekto sa kagubot sa Middle East.