Gipaklaro ni Senate Finance Committee Chairman JV Ejercito nga dili niya tugotan ang mga kalit nga pagsulod o pag-amendar sa 2027 national budget, ilabina kung wala kini mahibaloi sa publiko.
Matud ni Ejercito, adunay katungod ang mga miyembro sa Kongreso nga mosugyot og dugang nga pondo alang sa ilang mga prayoridad, apan kinahanglan kini buhaton sa public plenary debates aron masuta ug masabtan sa publiko ang matag kausaban.
Gihimo ni Ejercito ang maong pahimangno samtang gisusi sa Kongreso ang kapin P7.2 trilyon nga proposed national budget gikan sa kapin P11 trilyon nga mga hangyo sa nagkalain-laing ahensya sa gobyerno.
Matud pa niini, mas importante karon ang transparency sa budget process tungod sa mga kontrobersiya sa mga proyekto sa flood control sa miaging tuig.
Samtang, giingon ni Ejercito nga prayoridad usab niya ang sektor sa panglawas, lakip ang pagpalig-on sa mga ospital, pagpalapad sa sakop sa PhilHealth ug paghatag og dugang nga benepisyo alang sa mga senior citizen, PWD ug lumad.