Nasikop sa managlahing operasyon sa kapulisan ang duha ka wanted person nga nag-atubang og kasong homicide sa Malaybalay City ug Kalilangan, Bukidnon.
Unang nadakpan pasado sa alas 10:13 sa buntag sa Magsaysay Street, Barangay 2, Malaybalay City si Jeffrey Sinilagan Gumanon alyas “Jefry,” 31 anyos, minyo ug mag-uuma, human ipatuman sa mga sakop sa Malaybalay City Police Station, inabagan sa uban pang yunit.
Ang suspek adunay girekomendang piyansa nga 60 mil peso alang sa temporaryong kagawasan niini.
Samtang, nasikop usab takna sa alas 6:30 sa gabii niadtong milabay’ng sa Sitio Kalagutay, Barangay Ninoy Aquino, Kalilangan si Stephen Marbebe Arsenal, 57 anyos ug residente sa maong lugar.
Gipatuman usab batok kang Arsenal ang warrant of arrest nga gi-isyu niadtong Pebrero 11, 2009, nga adunay girekomendang piyansa nga 40 mil pesos.
Ang duha ka mga suspetsado anaa na sa kustodiya sa Malaybalay City Police Station ug Kalilangan Municipal Police Station, matag usa, alang sa dokumentasyon ug hustong disposisyon.