Usa ka 25-anyos nga babaye ang nasikop sa mga operatiba sa Iligan City Police Office (ICPO) atol sa usa ka entrapment operation batok sa online sexual abuse of children niadtong Abril 28 sa Barangay Sta. Elena, Iligan City.
Ang maong malampusong sting operation miresulta usab sa pagkakumpiska sa usa ka cellphone ug ID isip ebidensya, dungan sa pagluwas sa duha ka mga menor de edad nga babaye, nag-edad og 3 ug 12 anyos, kinsa gidala na sa City Social Welfare and Development (CSWD) alang sa dinaliang pag-atiman.
Kasamtangang nagtingkagol na sa bilangguan ang suspek samtang giandam ang pormal nga kasong paglapas sa Republic Act 11930 o ang Anti-Online Sexual Abuse or Exploitation of Children (OSAEC) ug Anti-Child Sexual Abuse or Exploitation Materials (CSAEM) Act batok niini.