Plano sa Department of Social Welfare and Development nga mahuman na ang nationwide distribution sa cash aid alang sa mga public utility vehicle operators ug drivers nga naapektuhan sa padayon nga pagsaka sa presyo sa mga produktong petrolyo.
Target sa ahensya nga mahuman ang pagpanghatag sa ayuda sa dili pa moabot ang Mayo 20.
Sumala ni DSWD spokesperson Irene Dumlao, nakapagawas na ang gobyerno og kapin sa P6 bilyon nga ayuda alang sa 1.2 milyon ka benepisyaryo sa nagkalain-laing bahin sa nasud.
Gilauman nga mosaka pa ang maong ihap gumikan kapin sa 800,000 ka drayber pa ang gilauman nga makadawat sa dili pa moabot ang Mayo 20.
Lakip sa mga sunod nga makadawat mao ang mga motorcycle taxi ug delivery service riders, nga sugdan sa umaabot nga semana.
Gisugdan sa DSWD ang maong cash aid distribution aron makatabang sa mga mamumuo sa transport sector nga naapektuhan sa sunod-sunod nga price hike sa petrolyo.
Lahi pa kini sa ayuda nga ginahatag sa Department of Transportation.