Lima ka tawo, lakip ang usa ka opisyal sa Bureau of Customs, ang gidakop sa hiniusang operasyon batok sa ilegal nga droga sa Adelaida Park Residences, Barangay Balulang, Cagayan de Oro City, niadtong milabay’ng adlaw.
Giila ang mga dinakpan sa alyas nga “Drew,” 39; “Cha,” 37; “Al,” 57; “Adi,” 41; ug “Ton,” 38, nga usa ka opisyal sa Bureau of Customs. Ang unang duha ka giingong kauban nga tag-iya ug nagpadagan sa maong drug den.
Narekober sa mga otoridad ang duha ka pakete sa gidudahang shabu nga motimbang og lima ka gramo, nga gibanabanaang nagkantidad og 34 mil pesos, lakip ang duha ka pusil, mga bala, drug paraphernalia, cellphone, usa ka sakyanan ug buy-bust money.
Ang operasyon gipahigayon sa Philippine Drug Enforcement Agency (PDEA)-10 Misamis Oriental Provincial Office, kauban ang mga personahe sa Cagayan de Oro City Police Office ug 1001st Regional Mobile Force Battalion.
Atubangon sa mga suspek ang mga kasong may kalabotan sa paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.