Daling didepensahan sa It’s Showtime host nga si Cianne Dominguez ang iyang co-host ug Kapamilya star nga si Kim Chiu human nituybo pag-usab ang mga espekulasyon sa social media nga matud pa nagdadalantao ang aktres.
Nagsugod ang maong tsismis gikan sa usa ka TikTok video ni Kim samtang naa kini sa airport, diin pipila ka mga netizens ang nag-ingon nga aduna matud pa’y nakitang “baby bump” sa iyang tiyan. Usa gani ka netizen nga nagpakilalang nars ang masaligon kaayong nikomento nga andam niyang i-uli ang iyang lisensya kon masayop man gani ang iyang hinala nga buntis si Kim.
Wala kini palpalisa ni Cianne ug dali nga nitubag sa maong komento: “Isauli mo na po, ako na nagsasabi,” isip pagpatingog nga walay katotohanan ang maong mga dungog-dungog.
Bisan pa man og aduna’y pipila ka netizens nga misaway sa pagpatol ni Cianne, daghan gihapon ang midipensa kang Kim ug nagpasabot nga natural lang nga “mapuson” ang aktres tungod sa iyang ka-wangwang ug pagkanipis og frame sa lawas. Sa kasamtangan, wala pa’y gipagawas nga opisyal nga pamahayag si Kim bahin sa maong isyu.