Buot sa Chinese Embassy nga ang Department of Foreign Affairs (DFA) ang manguna sa pagdumala sa mga panagsumpaki ug sa pagpalambo sa kinatibuk-ang bilateral relationship sa duha ka nasud.
Kini taliwala sa binayloay og hait nga mga pulong tali sa mga Chinese diplomat ug mga opisyal sa gobyerno sa Pilipinas, nga nagsumikad sa pagsupak sa China sa paggamit og caricature ni Chinese President Xi Jinping.
Sa usa ka pamahayag, gitubag sa Chinese Embassy ang awhag ni DFA Maritime Affairs spokesperson Rogelio Villanueva Jr. nga kinahanglan mahimong “konstruktibo” ang embahada sa ilang mga gipamahayag. Matud sa embahada, gihatagan nila og bili ang usa ka tinuoray ug konstruktibong dayalogo uban sa DFA nga adunay respeto sa usag-usa.
Gibasol usab sa embahada ang nahitabong lalis ngadto sa giingong “pag-atake ug pagdaot” ni Philippine Coast Guard (PCG) spokesperson for the WPS Commodore Jay Tarriela batok sa China ug sa lider niini. Depensa sa embahada, wala sila nag-una-una og atake, kondili nitubag lamang sila sa paagi nga “kalmado, propesyonal, ug konstruktibo” aron depensahan ang ilang nasudnong interes ug dignidad.
Tungod niini, nanawagan ang embahada alang sa usa ka “healthy dialogue” tali sa China ug Pilipinas nga nanginahanglan og positibong mga pamahayag gikan sa duha ka habig.