Abante na sa Round of 16 sa FIFA World Cup 2026 si Erling Haaland ug ang Norway human nila mapildi ang Ivory Coast, 2-1, sa Round of 32.
Ang unang goal sa Norway gipasulod ni Antonio Nusa sa ika-39 nga minuto sa first half. Sa second half, natabla sa Ivory Coast ang dula pinaagi kang Amad Diallo sa ika-74 nga minuto, apan gilayon kining gitubag ni Haaland pinaagi sa game-winning goal sa ika-86 nga minuto.
Ikalima na kini nga goal ni Haaland sa maong torneo, ug ikaduha siya sa top scorers luyo ni Lionel Messi nga adunay pito ka goals.
Naningkamot pa ang Ivory Coast nga madala ang duwa sa extra time, apan napugngan kini sa maayong depensa sa Norway, lakip ang kritikal nga save ni goalkeeper Ørjan Nyland sa free kick ni Diallo sa katapusang mga minuto.
Kini usab ang unang higayon nga nakasulod ang Norway sa Round of 16 sa FIFA World Cup sukad pa niadtong 1998.
Sunod nga makigsangka ang Norway batok sa Brazil, ang lima ka higayon nga World Cup champion, nga nakalusot usab sa knockout stage human mapildi ang Japan.