Kalit nga nadisgrasya ang usa ka Bongo nga gisakyan sa mga sakop sa Barangay Public Safety Officers (BPSO) sa Barangay 7, Malaybalay City sa Maluko, Manolo Fortich niadtong kagahapong adlawa, Mayo 8, 2026.
Nahitabo ang maong insidente pasado ala-una sa hapon samtang pauli na matud pa ang mga biktima gikan sa Talisayan, Misamis Oriental.
Sa kakusog sa impak, nangalagpot ang mga pasahero ug dako ang nahimong kadaot sa parte sa maong sakyanan human gikatahong miungot ang brake hinungdan sa maong insidente.
Dali nga miresponde ang mga otoridad aron matabangan ang mga biktima nga nakasinati og seryosong samad sa lawas.
Sa pagkakaron, padayon pa ang gihimong imbestigasyon sa kapulisan aron matino ang tinuod nga hinungdan sa pagkabalintong sa sakyanan.
Nagpahinumdom usab ang mga opisyal sa publiko nga magmabinantayon kanunay sa pagbiyahe aron malikayan ang susamang trahedya.