Gianunsyo sa Massachusetts Port Authority (Massport) nga ilang selebrasyonon ang FIFA World Cup 2026 pinaagi sa pagtukod sa giingong pinakadakong soccer ball sa kalibutan.
Ang maong bola adunay diyametro nga 45 feet, mas dako kumpara sa miaging rekord sa Doha Bank sa Qatar niadtong 2013 nga 39 feet ug 11.8 ka pulgada.
Itukod kini sa Piers Park II sa East Boston gikan Hunyo 12 hangtod Hunyo 18, ug aduna usab Community Day sa Hunyo 13 alang sa mga residente ug bisita.
Kabahin kini sa selebrasyon sa World Cup games nga ipahigayon sa Boston Stadium sa Foxborough karong Hunyo ug Hulyo.
Sumala sa Massport, ang maong higanteng display maghatag og higayon sa publiko nga magtapok, makatagamtam sa waterfront ug skyline sa East Boston, ug mabati ang kasadya sa World Cup.