Nakabsan sa kinabuhi sa dihang nalatayan sa usa ka trailer truck ang usa ka 26-anyos nga guidance facilitator samtang motabok sa Gabucayan Street, Barangay 22 ning dakbayan kaganihang buntag.
Giila ang biktima nga si Christel Faustine Catodio, lumad nga taga-Malaybalay City, Bukidnon, ug nagtrabaho sa Capitol University Senior High School. Si Catodio maoy usa usab sa mga opisyal nga kandidata sa Miss Malaybalay City niadtong Marso 2026.
Subay sa imbestigasyon ni Police Captain Joshua Abrasaldo, Deputy Chief sa CDO Traffic Enforcement Unit, gikan sa iyang gipuy-an nga boarding house ang biktima ug motabok unta aron mag-atbang og sakyanan paingon sa tunghaan dihang nalatayan sa trailer truck nga gimanho ni Christopher Riedo, nga taga-Antipolo City, Rizal. Nangatarungan ang drayber nga wala niya namatikdan ang biktima sa iyang atubangan tungod sa gihabogon sa iyang sasakyan.
Sumala sa saksi sa aksidente, nagtuaw pa ang ubang motorista aron paunongon ang drayber dihang nasangit ang tiil sa biktima, apan sa kataranta sa drayber, nalahos kini ug nalatayan ang tibuok lawas sa biktima.
Miboluntaryong nagtahan sa kapolisan ang drayber nga si Riedo ug nag-atubang na sa kasong Reckless Imprudence Resulting in Homicide, samtang nagpahimangno ang mga awtoridad sa mga pedestrian nga mag-amping sa pagtabok sa maong peligroso ug busy nga dalan.