Sikop sa Japan ang usa ka 32-anyos nga babaye tungod sa giingong paghimo og kapin 2,000 ka peke nga online orders sa manga ug ubang merchandise nga nakaresulta sa kapin P2.8 milyon nga direktang kapildihan sa usa ka publishing company.
Giila ang suspek nga si Mayu Yoshida, usa ka restaurant worker gikan sa Osaka.
Sumala sa mga imbestigador, migamit siya og 238 ka peke nga account aron balik-balik nga mo-order og manga ug ubang produkto sa Shueisha Inc. sulod sa hapit usa ka tuig.
Base sa imbestigasyon, mokabat sa 4.3 bilyon yen o kapin P1.6 bilyon ang kinatibuk-ang kantidad sa iyang mga order gikan 2024 hangtod 2025, apan wala matud siya mobayad bisan usa niini.
Giingong migamit si Yoshida og convenience store payment system ug cash-on-delivery option, apan wala niya ipadayon ang pagbayad o pagdawat sa mga produkto nga gipadala kaniya.
Tungod niini, gibanabanang mokabat sa 7.5 milyon yen o kapin P2.8 milyon ang direktang kapildihan sa kompanya alang sa shipping ug logistics expenses.
Sa imbestigasyon, miangkon si Yoshida nga siya ang luyo sa liboan ka mga order.
Matod niya, gihimo niya kini aron makunhuran ang iyang stress ug nakahatag usab kaniya og kalipay ang pag-order sa mga produkto nga dali mahurot sa merkado.