Gilauman sa mga House prosecution nga mas daghang detalye ang mahimong mahibal-an gikan kang Attorney Michael Wesley Poa bahin sa paggamit sa P112.5 milyon nga confidential funds sa Department of Education.
Atol sa impeachment trial ni Vice President Sara Duterte, moatubang si Poa isip hostile witness sa House prosecution.
Matud ni House impeachment advisor Robert Ace Barbers, adunay mga dokumento nga miagi kang Poa alang sa pagsusi ug pagpirma atol sa iyang pagka-Chief of Staff ug spokesperson ni Duterte sa DepEd.
Gipunting usab ni Barbers ang mga military certification nga gisumite sa DepEd isip supporting documents sa liquidation sa confidential funds.
Una nang miingon sila retired Colonel Manaro Boransing ug Magtanggol Panopio nga wala sila makahibalo nga gamiton ang ilang mga certification alang niini nga katuyoan.
Samtang, matud ni Deputy Speaker Paolo Ortega, mas daghan pa matud pang mga impormasyon ang mahimong mogawas sa pag-atubang ni Poa sa impeachment court, diin mahimo usab kining pangutan-on sa mga senator-judge.
Samtang sa laing bahin, wala’y miyembro sa House prosecution panel nga nagplano nga mobiya isip prosecutor sa impeachment trial, sumala kang House impeachment prosecutor Representative Terry Ridon.
Matud ni Ridon, padayon nilang sundon ang sub judice rule sa impeachment court, samtang mangita sila og paagi aron mapahibalo gihapon ang publiko bahin sa mga kalamboan sa kaso sulod sa gitugot sa maong lagda.