Gikabalak-an karon sa publiko ang posibleng mas mugrabe pang epekto sa nagpadayon nga tensyon sa Middle East, dili lamang sa presyo sa lana apan lakip usab sa kinatibuk-ang kahimtang sa ekonomiya sa nasud.
Sa pakighinabi sa Bombo Radyo Malaybalay kang Ray Talimio Jr., kanhi myembro sa Economic Development Committee sa Regional Development Council-10, nga base sa obserbasyon niini, posible nga mosaka pa ang inflation rate sa Pilipinas sa katapusan sa bulan sa Marso.
Matud niini, sa miaging bulan natala ang inflation rate nga 2.4 porsyento, apan gibanabana nga mahimo kining mosaka ngadto sa 3.5 porsyento niining kasamtangang bulan gumikan sa posibleng pagsaka sa presyo sa produktong petrolyo ug uban pang batakang palaliton.
Sigon ni Talimio, nga adunay posibilidad nga maapektuhan ang gross domestic product kon GDP sa nasud, diin gilaoman nga magpabilin lamang kini sa taliwala sa 3 hangtod 4 porsyento nga pagtubo.
Sumala niini, dako kini nga hagit alang sa ekonomiya sa Pilipinas, ug mahimong mosamot pa ang problema kung moubos pa ang maong growth rate.
Bisan pa niini, gidayeg ni Talimio ang lakang sa gobyerno sa paghatag og fuel subsidy aron makatabang sa sektor sa transportasyon batok sa pagsaka sa presyo sa lana.
Apan, gipadayag usab niini ang kabalaka nga mahimong motumaw ang kagubot o dili pagkasinabtanay tali sa ubang sektor tungod ang mga benepisyaryo sa programa karon nagpunting lamang sa mga driver sa public utility vehicles.