Misurender ang 63 ka kanhing miyembro sa rebeldeng grupo samtang 87 pa ka dugang nga indibidwal ang nag-aplay sa amnestiya atol sa mass surrender nga nahitabo niadtong Pebrero 28, sumala ni 89th Infantry Battalion Civil Military Operations Officer Cpt. Ariel O. Asentista.
Gibutyag ni Asentista nga ang mga kanhing rebelde gi-enroll sa Enhanced Comprehensive Local Integration Program o E-CLIP, nga naghatag og financial ug livelihood assistance, lakip na ang pag-aplay sa amnesty aron matabangan sila sa pagpa-dismiss sa mga kasong may kalabotan sa ilang kanhi pag-apil sa kalihukan.
Matud pa sa opisyal, dako ang papel sa maong mga programa sa pag-reintegrate sa mga kanhing rebelde balik sa mainstream society aron makapuyo sila og malinawon uban sa ilang pamilya ug komunidad.
Dugang pa niya, kasagaran sa mga misurender mitug-an nga nawad-an na sila og ideolohiyang gituohan, naglisod na sa pagpuyo sa kabukiran, ug nangandoy makabalik sa ilang pamilya, maong mipili silang mobalik sa sabakan sa gobyerno ug magsugod og bag-ong kinabuhi.