Tungod sa grabeng kasuko, usa ka pamilya sa South Africa ang nakahimo og katingad-an nga lakang pinaagi sa pagdala sa patayng lawas sa ilang kabanay sulod mismo sa opisina sa Capitec Bank.
Kini human malangan ang bangko sa pagpagawas sa ilang death insurance claim. Sa mga video ug hulagway nga nag-trending sa social media, makita ang patayng lawas nga nakabalot ug nakapahimutang sa salog dapit sa customer service area.
Matod sa pamilya, napugos kini sa pagbuhat niini isip “ebidensya” sa kamatayon sa ilang kabanay human maglisod sa pagkuha sa funeral insurance.
Isip tubag sa maong insidente, daling gipasirad-an sa mga empleyado ang maong opisina alang sa seguridad ug sanitasyon sa palibot.
Gipahinumdoman usab sa maong bangko ang publiko nga Death Certificate ang gikinahanglan sa pag-claim sa insurance ug dili ang aktuwal nga patayng lawas.
Sa pagkakaron, nagpahigayon na og lawom nga imbestigasyon ang kompanya aron masuta ang hinungdan sa pagkalangan sa serbisyo ug aron maseguro nga dili na mausab ang maong makapakurat nga panghitabo.