Mikabat sa P9.33 bilyon ang kinatibuk-ang kita sa National Telecommunications Commission (NTC) niadtong 2025, nga mas taas tandi sa gitakdang target sa ahensya.
Matud sa NTC, ang ilang nakolekta nga kita milabaw sa target nga P6.622 bilyon, nga nagpakita og dakong kalampusan sa revenue performance.
Sumala ni NTC Commissioner Ella Blanca Lopez, tungod kini sa mas hugot nga regulatory compliance sa sektor sa telekomunikasyon.
Gisulti usab niini nga nakadugang ang mas istriktong pagpatuman sa mga regulasyon ug mas episyenteng collection system.
Lakip pa sa hinungdan ang padayong pagtubo sa industriya sa telecommunications.
Gitin-aw sa komisyon nga ang tanang nakolektang kita diretso nilang ginasumite sa Bureau of the Treasury.
Gigamit kini sa pagpondo sa nagkalain-laing programa sa gobyerno, lakip na ang Free Wi-Fi Program sa DICT.