Gibarogan sa National Bureau of Investigation nga ang pugante nga negosyante nga si Charlie ”Atong” Ang anaa pa sa nasud.
Sa pakighinabi kang Atty. Angelito Magno, acting director sa National Bureau of Investigation, gipaambit niini nga nagtuo sila nga anaa pa sa Pilipinas ang maong pugante.
Matud niini nga nagpadayon ang ‘manhunt operations’ sa maong ahensya sa pagpangita ug pagtino sa nahimutangan ni Atong Ang, kinsa sa pagkakaron wala pa makit-i.
Dugang pa niini, nga nakig-alayon usab sila sa nagkadaiyang mga embahada sa posibleng higayon nga adunay impormasyon nga mubiya na kini sa nasud.
Apan tungod sa kakulang sa opisyal nga pamahayag gikan sa Department of Foreign Affairs ug Bureau of Immigration, gitataw nga posibleng anaa pa sa Pilipinas ang pugante nga si Atong Ang.
Samtang gipasalig niini nga gihimo sa ahensya ang tanan aron masulbad ang gikaingong ‘manhunt operations’.
Kalabot niini, hugot nga gipanghimakak sa maong direktor ang gikaingong koneksyon sa pipila ka personnel sa National Bureau of Investigation ngadto kang Atong Ang.
Gihimakak usab niini ang isyu nga gikaingong gisubornohan sila ug miluwat nga wala kini kalambigitan sa maong panghitabo.
Kahinumdoman nga ang negosyante nga si Charlie ‘Atong’ Ang giisyuhan kaniadto og warrant of arrest sa Regional Trial Courts sa Lipa, Batangas ug Sta. Cruz, Laguna.
Nag-atubang kini og kasong ‘kidnapping with homicide’ ug ‘kidnapping with serious illegal detention’ nga adunay kalabotan sa pagkawala sa mga sabungero.