Diskompyado karon ang Hanabana Water Corporation sa planong pakig-alayon sa PrimeWater Corporation ilawom sa bag-ong pagdumala sa negosyanteng si Lucio Co, tungod sa kabalaka sa kalidad sa serbisyo sa panubig.
Sa eksklusibong pakighinabi sa Bombo Radyo Malaybalay kang Ramonito N. Sagocsoc, Bise-Presidente sa Hanabana Water Corporation, gibutyag niini nga base sa obserbasyon sa operasyon sa Pamana Water Corporation sa Pagadian City nga gipanag-iyahan ni Co nga karon mao usab nagdumala sa PrimeWater, nga palpak ug wala matuman ang gilaumang pagserbisyo niini sa mga konsumidor.
Bisan pa niini, andam gihapon ang Hanabana nga susihon ang posibilidad sa pakig-alayon, apan hangtod karon wala pay nadawat nga opisyal nga tubag gikan sa PrimeWater sa gisugyot nga kasabutan.
Samtang naghulat, padayon ang Hanabana Water Corporation sa plano sa pagtukod og kaugalingong planta sa syudad aron masiguro ang lig-on ug episyenteng bulk water supply.
Gilaoman nga masugdan na karong tuiga ang pagsuplay sa limpyo ug igo nga tubig hilabi na sa tulo ka barangay nga target tukoran og Level III water system, lakip ang Barangay Patpat, Sumpong, ug Kalasungay, nga tumong makatubag sa dugay nang problema sa mga residente.