Giklaro sa Department of Information and Communications Technology (DICT) nga ang mga dokumento kalabot sa pag-host sa Pilipinas sa ASEAN 2026 nga gikatahong “ni-leak” online, ang walay sulod nga mga sensitibo o importante kaayo nga impormasyon.
Sumala sa DICT, base sa ilang unang ebalwasyon, ang maong mga dokumento kay mga “preparatory” ug “administrative” lamang—nagpasabut nga kini mga plano pa lang para sa pagpangandam ug pagdumala sa maong event.
Gisiguro sa ahensya nga wala’y nahilakip nga mga “substantive agenda papers,” mga opisyal nga deliberasyon, o mga diskusyon sa polisiya sa nasangpit nga leak. Wala usab silay nakitang timailhan nga na-kompromiso ang mga sistema o plataporma sa ASEAN.
Sa pagkakaron, nakigtambayayong na ang DICT sa Philippine National Police (PNP) ug uban pang mga intelligence agencies aron imbestigahan ang maong insidente. Gipasalig usab sa kagamhanan nga gipahugtan na nila ang cybersecurity measures sa mga dapit nga pagahimoan sa ASEAN 2026 ug sa mga digital infrastructure aron masiguro nga luwas ang tibuok aktibidad.
Tungod kay nagpadayon pa ang imbestigasyon, dili una mohatag ang DICT og dugang detalye bahin sa operasyon, apan gipahinumdoman nila ang publiko nga seryoso ang gobyerno sa pagpanalipod sa seguridad sa nasud ug sa relasyon niini sa ubang mga nasud.