Gisasay sa mga residenti sa syudad sa Malaybalay ang ilang mga mulo kabahin sa kapakyasan sa Prime Water sa ilang serbisyo.
Sumala ni Rena Capilitan, lumulopyo sa P-2, Barangay San Jose, Malaybalay City, Bukidnon , nga muagas ra matud pa ang suplay sa tubig matag alas singko sa hapon hangtod alas onse sa gabie ug sa sunod adlaw na matud pa mubalik sa hapon.
Sa karon, padayon ang panghinaot ni Rena ug ang mga silingan niini nga sulosyonan sa Prime Water ang ilang dugay na nga panawagan gumikan importante matud pa ang tubig sa kinabuhi sa tawo gumikan kini sumpay sa kinabuhi.
Dugang pa ni John Stephen Ducot, lumulopyo sa Barangay Casisang, Malaybalay City, Bukidnon duna sab mga higayon nga pipila kaadlaw wala matud pay suplay sa tubig, ug galing muagas man, usa lamang ka oras kining muserbisyo ug hapon na mubalik sa susamang adlaw rason nga gapundo ang mga konsumante og tubig ulan.
Dako matod pa kini og ginabayaran sa iyang bill sa tubig bisan pa man nga walay tarong serbisyo ang Prime Water.Niabot matud pa ang higayon nga mas dako pa og bill ang iyang mga higala tandi kaniya bisan pa man sa way ayong serbisyo sa suplay sa tubig. Matud pa ni John, dili matud pa kini patas.
Nanawagan subli ang mga konsumante nga hingpit ng matarong sa Prime Water ang ilang pagpanerbisyo. Gani, misulay na matud sab kini og reklamo sa opisina sa Prime Water, apan igo lamang matud pa kini gipasa-pasa sa mga staff ug dili sab matud pa tarungon og tubag ang mga konsumante.