Nagduso si Senator Erwin Tulfo og sugyot balaodnon nga magpaubos sa value-added tax (VAT) gikan sa 12% ngadto sa 10% isip tubag sa padayong pagsaka sa presyo sa mga paliton ug serbisyo sa nasod.
Ubos sa Senate Bill No. 1552 o ang VAT Reduction Act of 2025, gipasabot ni Tulfo nga ang pagkunhod sa VAT direktang makapamenos sa palas-anon sa mga Pilipino ug makapalig-on sa ilang katakos sa pagpamalit.
Sumala sa senador, imbes nga magsalig ang katawhan sa ayuda nga posibleng mausik tungod sa korapsyon, mas angay nga ang kwarta magpabilin sa bulsa sa mga konsumidor. Giingon usab niya nga ang mas ubos nga VAT mahimong makapadasig sa paggasto, nga makatabang sa paglambo sa ekonomiya ug makapabawi sa posibleng kakuwang sa kita sa gobyerno.
Gihisgotan ni Tulfo nga ang Pilipinas ug Indonesia ang adunay pinakataas nga VAT sa Southeast Asia sa 12%, samtang ang ubang silingang nasod anaa lamang sa 7% hangtod 10%.
Sa laing bahin, nagpahayag og kabalaka si Department of Finance Secretary Ralph Recto, nga posibleng makaapekto ang VAT cut sa credit rating sa nasod ug makaminus sa pondo alang sa imprastraktura, edukasyon, ug serbisyong panglawas.