Mitaliwan na ang representante sa ikaduhang distrito sa Antipolo City nga si Rep. Romeo Acop. Kini ang gikompirma ni Deputy Speaker Ronaldo Puno, usa ka suod ug dugay nang higala ni Acop.
Matod ni Puno, ang pagpanaw sa maong kongresista naghatag og dakong kaguol dili lang sa Kongreso kondili sa tibuok nasod. Sa mensahe nga gipadala ni Deputy Speaker Puno sa Bombo Radyo, iyang gipaambit nga si Acop bag-ohay lang malampusong naoperahan sa kidney transplant niadtong Nobyembre 28 ug miayo na unta ang iyang kahimtangan human sa operasyon.
Matod pa, nakapaalim na kini ug nakabangon-bangon, hinungdan nga naglaum ang iyang mga kauban nga makabalik siya sa iyang katungdanan sa labing madaling panahon. Apan kalit lang giatake sa kasingkasing si Rep. Acop nga maoy hinungdan sa iyang kamatayon. Ang kalit nga panghitabo nakapakurat ug nakapaguol pag-ayo sa iyang pamilya, mga higala, ug mga kauban sa serbisyo publiko.
Gipaambit pa ni Deputy Speaker Puno nga kapin sa 25 ka tuig niyang nakahigala ug nakatrabaho si Acop, kinsa iyang gihulagway isip usa ka matinud-anon, isog, ug dungganon nga sulugoon sa katawhan nga tibuok kasingkasing nga nag-alagad sa Pilipino.
Dugang pa niya, usa ka dakong kawalan alang sa Kongreso ug sa nasod ang pagkawala ni Rep. Acop, ilabi na taliwala sa iyang padayon nga pagpangalagad ug mga adbokasiya alang sa kahapsay ug kaayohan sa katawhan.