Gipasakaan og Letter of Inquiry (LOI) sa DTI Bukidnon ang 15 ka dagkong tindahan sa lalawigan aron masiguro nga sundon ang Price Freeze sa basic necessities. Sa pakighinabi sa Bombo Radyo Malaybalay, gibutyag ni Junar Merla, Chief sa Consumer Protection Division sa DTI Bukidnon, nga duha niini nahimutang sa Quezon, tulo sa Manolo Fortich, tulo sa Maramag, ug uban pa sa Valencia ug Malaybalay gikan sa miaging monitoring.
Gipahibalo ni Merla nga ang pag-issue sa Letter of Inquiry (LOI) nagsunod sa State of Calamity, diin gi-enforce ang Price Freeze Bulletin sa tibuok lalawigan ug nasod hangtod January 5, 2026, aron maprotektahan ang mga konsumidor gikan sa posibleng pagtaas sa presyo human sa sunod-sunod nga kalamidad.
Gidugang pa niini nga padayon ang monitoring sa uban pang tindahan aron masiguro nga matuman ang regulasyon ug malikayan ang pag-abuso sa presyo sa mga negosyante.
Gipaniguro sa DTI Bukidnon nga protektado ang katawhan ug magmatngon ang mga tindahan karong panahon sa kalisod.