Gitinguha karon sa mga personahe sa Armed Forces of the Philippines (AFP) pinaagi sa 89th Infantry Battalion nga hingpit nang mapasig-uli ang kalinaw ug seguridad sa lalawigan sa Bukidnon pinaagi sa pagdeklara niini nga insurgency-free.
Matud ni LTC Antonio Bulao I, Commanding Officer sa 89th Infantry Battalion, adunay 87 ka mga Former Rebels (FRs) nga misurrender niadtong bulan sa Enero, diin mao usab ang mitudlo sa pipila pa nilang mga kauban nga nahibilin sa kalihukan.
Subay sa mga lakang, mipahigayon gilayon og upat ka adlaw nga FR Summit niadtong Agosto 8, 2025 sa Barangay Butong, Quezon, Bukidnon.
Sa maong kalihukan, adunay 189 ka Former Rebels ang mitahan ug boluntaryong misurrender sa gobyerno isip kabahin sa usa ka landmark peace event.
Gawas niini, 72 ka nagkalain-laing armas ug walo (8) ka war materials ang gidala sa mga misurender, uban sa pagdawat nila sa nagkalain-laing porma sa tabang gikan sa gobyerno, lakip ang P10,000 cash grant gikan DSWD, P10,000 sa LGU sa Valencia City, P15,000 cash grant matag usa gikan sa Provincial Government, ug P50,000 livelihood assistance pinaagi sa Enhanced Comprehensive Local Integration Program (E-CLIP).
Pinaagi sa padayong tinguha ug paningkamot sa AFP ug mga lokal nga kagamhanan, gilauman nga maproklamar nga insurgency-free ang Valencia City sa Oktubre, ang Quezon sa Nobyembre, ug ang tibuok lalawigan sa Bukidnon sa sunod nga mga bulan.