Nagpabiling nanguna ang probinsya sa Bukidnon sa tibuok nasud sa produksyon sa agrikultura ug pangisdaan sa tuig 2024, base sa datos nga giluwat sa Philippine Statistics Authority kon PSA.
Base sa mga datos sa PSA, mikabat sa P2.41 trilyon ang kinatibuk-ang produksyon sa agrikultura ug pangisdaan sa Pilipinas, diin ang mga tanom mao ang nag-una sa dakongkontribusyon.
Sa maong rekord, ang Bukidnon maoy nanguna isip top contributor nga miabot sa P145.60 bilyon, diin gikatahong labing taas nga produksyon tandi sa tanang probinsya.
Sa crop production, ang Bukidnon usab ang nag-una nga nagkantidad og P93.36 bilyon, mas taas kay sa Isabela, Pangasinan, Nueva Ecija, ug Negros Occidental.
Samtang ang ubang probinsya gawas sa Bukidnon, diin ang Pangasinan ang misunod sa produksyon nga P93.49 bilyon; Pampanga nga mikabat sa P93.29 bilyon; Negros Occidental nga adunay P83.02 bilyon; ug Batangas nga mitala og P82.37 bilyon.
Kabahin sa poultry ug livestock nga produksyon, ang Batangas ang nangulo sa produksyon nga mikabat sa P36.70 bilyon sa poultry ug P32.28 bilyon sa livestock.
Gisundan kini sa Bulacan, Pampanga, Tarlac ug Cebu sa poultry, samtang sa livestock gisundan usab sa Cebu, Davao del Sur ug Pampanga.
Alang sa fisheries sector, ang Pampanga ang nagtala sa labing taas nga produksyon nga P37.9 bilyon, gisundan sa South Cotabato, Pangasinan, Palawan ug Zamboanga del Sur.
Kahinumdoman nga kini gipagawas nga datos sa Philippine Statistics Authority niadtong Miyerkules, Setyembre 24, 2025.