Gipahimangnoan ang katawhan sa syudad sa Malaybalay nga mag-igmat sa posibleng paglandslide gumikan sa sunod-sunod nga pag-ulan.
Matud ni Arian Johnson Caga-anan, Operations and Warning Division Head sa Malaybalay CDRRMO, nga makasinati ang nasud sa low-pressure nga nahimong tropical depression nga gi-ngalanang ‘Crising,’ pinaagi sa anunsyo sa Philippine Atmospheric, Geophysical and Astronomical Services Administration (Pagasa) niadtong Miyerkules sa buntag.
Subay niini, miluwat si Caga-anan, nga kanunay andam ang Malaybalay CDRRMO alang sa pagresponde sa mga katalagman.
Gani, gimonitor na sa buhatan ang mga landslide prone areas ug flood prone area sama sa Basakan District.
Dugang pa ni Caga-anan, nga gipahimangnoan na usab ang mga barangay ug sitio sa syudad sa Malaybalay alang sa mga posibilidad sa paglandslide, pagbaha ug uban pangkatalagman gumikan sa nasinating pag-ulan.