Gipahayag ni Dr. Miguel Antonio Prantilla, chief of hospital sa Bukidnon Provincial Medical Center (BPMC), ang kahinungdanon sa hustong referral system ug paggamit sa tukmang pamaagi sa pagpasaka sa reklamo aron masulbad ang mga problema sa serbisyo sa ospital.
Kini human sa mga reklamo nga nalambigit sa pag-atiman sa mga pasyente ug sa pagtratar sa mga health worker sa maong pasilidad.
Matud ni Prantilla, dili angay nga tibuok ospital o tanang health worker ang basulon kon adunay reklamo batok sa usa ka empleyado.
Gidugang niya nga mas maayong sulbaron ang mga isyu pinaagi sa hustong pamaagi imbes nga idiretso kini sa social media.
Gipasabot usab sa doctor nga ang referral system gitumong aron masiguro nga mahatagan og tukmang pag-atiman ang mga pasyente ug malikayan ang dili husto nga pagdagsa sa mga tawo sa ospital.
Dugang pasa doctor, nag-andam na ang provincial health office sa mga gikinahanglang kagamitan ug kawani alang sa patient navigation ug referral system nga motabang sa pagdumala ug pag-apod-apod sa mga pasyente ngadto sa angay nga mga pasilidad.