Patay ang usa ka 54-anyos nga mag-uuma human kini gisungag sa iyang kaugalingong kabaw samtang nagdaro sa iyang humayan diha sa Purok Malinawon, Barangay Pinamaloy, lungsod sa Don Carlos, Bukidnon.
Subay sa impormasyon , gidala pa sa Bukidnon Provincial Hospital sa Maramag ang biktima apan gideklarar kining dead on arrival sa doktor tungod sa grabeng samad sa ulo nga iyang nahiaguman.
Base sa pahayag sa nakasaksi, nahitabo ang insidente kagahapon sa hapon, Oktubre 20, samtang nagdaro ang biktima sa iyang umahan. Nasayran nga gibunalan sa mag-uuma ang kabaw hinungdan nga misukol ug misungag kini diretso sa iyang ulo.
Gipahimutang na sa pamilya ang minatay sa biktima samtang pormal nang gitapos sa kapulisan ang ilang pagsubay sa maong aksidente.