Naimbargo ang armas sa usa ka pulis nga nadestino sa Pasay City human kini gipasakaan og reklamo sa National Police Commission (NAPOLCOM) tungod sa pagpang-abuso ug pagpanghulga sa iyang kapuyo.
Sumala sa taho ug sa mga ebidensya nga gipakita sa CCTV footage sa NAPOLCOM, pipila ka higayon nga gidagmalan ug gipasakitan sa maong pulis ang biktima diha sa ilang balay ug bisan sa sulod sa sakyanan. Makita usab sa ebidensya ang pagpanakit sa lalaki samtang kugos-kugos pa sa biktima ang ilang gamay nga anak.
Gawas sa physical nga pagpanakit, gisaysay sa biktima nga gitionan pa siya og pusil ug giingong gihulga nga patyon aron makuha ang iyang telepono nga adunay mga ebidensya sa pagpang-abuso. Giingong nagsugod ang ilang pag-away tungod sa pamilya sa pulis ug misamot pa ang pagtrato niini kaniya.
Tungod sa kabug-at sa insidente ug sa kahadlok sa biktima sa iyang kinabuhi, daling milihok ang NAPOLCOM aron kumpiskahon ang iyang issued nga armas ug gipahigayon na ang sakto nga imbestigasyon alang sa administratibo ug kriminal nga kaso nga giatubang sa maong opisyal.