Usa ka talagsaong pagtuon sa Europe ang nakadiskubre nga mas dali molupad palayo ang mga langgam kon moduol ang babaye kaysa lalaki, apan wala pa masayri sa mga siyentista ang tukmang hinungdan niini.
Nasayran kini sa pagtuon nga gihimo sa lima ka nasod sa Europe ug naglakip sa 37 ka klase sa langgam.
Sumala sa mgaresearchers, sa aberids, makaduol ang mga lalaki og mga usa ka metro nga mas duol sa mga langgam sa dili pa kini molupad palayo, kon itandi sa mga babaye.
Lakip sa naobserbahan ang mga maya, blackbird ug pigeon, ug nakahimo ang mga siyentista og 2,701 ka obserbasyon.
Posibleng adunay kalabotan ang reaksyon sa mga langgam sa baho, porma sa lawas o paagi sa paglakaw sa tawo, apan mga pangagpas pa lamang kini.
Matod sa mga tigdukiduki, gikinahanglan pa ang dugang pagtuon aron mahibal-an kon unsang mga timailhan ang namatikdan sa mga langgam ug nganong lahi ang ilang reaksyon sa mga babaye ug lalaki.