Gipasidan-an sa United Nations (UN) ang posibleng 50 milyong tawo nga maapektuhan sa grabeng krisis sa pagkaon tungod sa nagkaduol nga Super El Niño nga gilaumang moigo sa pipila ka rehiyon sa kalibotan.
Sumala sa World Meteorological Organization (WMO), posibleng molapas sa naandang sukdanan ang kakusog sa Super El Niño, nga gilaumang moabot sa kinatumyan sa Disyembre karong tuiga hangtod sa 2027.
Lakip sa posibleng maapektuhan ang mga nasud sa Asya, Pacific, Latin America, ug Africa, diin gikabalak-an ang kakulang sa pagkaon ug panginahanglan sa hinanaling tabang.
Sa laing bahin, giawhag sa UN ang mga gobyerno ug internasyonal nga institusyon nga magpatuman og sayong pagpangandam aron maminusan ang epekto sa Super El Niño, ilabina sa mga komunidad nga labing huyang sa kalamidad.