Gikabalak-an sa sektor sa agrikultura ang sayo nga kadaot sa mga pananom tungod sa El Niño nga mikabat na sa ₱6.87 bilyon, diin kapin sa 223,000 ka mag-uuma ug 240,000 ka ektarya sa uma ang naapektuhan.
Pinakadako ang kadaot sa sektor sa mais nga mikabat sa ₱4.9 bilyon, samtang ₱1.5 bilyon ang nawala sa sektor sa humay.
Matud sa partido sa MAGSASAKA, posibleng moresulta kini sa domino effect sa ekonomiya, lakip ang pagtaas sa presyo ug pagkunhod sa suplay sa karne tungod sa kakulang sa pagkaon ug tubig alang sa mga kahayopan.
Gisugyot ang pagbalhin sa mga alternatibong pananom sama sa ube ug kamoteng kahoy nga dili kaayo manginahanglan og tubig ug abono.
Nanawagan ang grupo sa gobyerno nga magpatuman og permanenteng solusyon ug dinaliang lakang aron mapanalipdan ang mga mag-uuma ug malikayan ang mas dakong krisis sa suplay sa pagkaon.