Nagpasidaan ang United Nations (UN) sa posibleng grabeng epekto sa Super El Niño nga gilaumang moabot sa kinatumyan sa Disyembre ning tuiga ug molungtad hangtod sa 2027.
Matud ni World Meteorological Organization Secretary-General Celeste Saulo, posibleng mahimong talagsaon ang maong panghitabo, samtang gilauman nga modaghan ug mosamot ang grabeng mga kahimtang sa panahon.
Gipasidaan usab ni UN Humanitarian Affairs Undersecretary-General Tom Fletcher nga posibleng maapektuhan pag-ayo ang Latin America, Africa, Asya ug rehiyon sa Pasipiko tungod sa posibleng pagsaka sa presyo sa krudo ug abono, ug pagkunhod sa pinansiyal nga tabang.
Gibanabana nga 50 milyon ka tawo ang posibleng mag-atubang sa grabeng kagutom tungod sa epekto niini.
Tungod niini, giawhag sa UN ang mga gobyerno ug internasyonal nga mga institusyong pinansiyal nga molihok dayon aron maandam ang mga komunidad sa dili pa mahitabo ang grabeng kadaot.