Giisyuhan og Letter of Inquiry (LOI) sa Department of Trade and Industry (DTI) ang lima ka grocery stores sa Bukidnon human namatikdan nga milapas sa Suggested Retail Price (SRP) ang presyo sa pipila nilang mga baligya.
Sa pakighinabi sa Bombo Radyo Malaybalay, gipadayag ni DTI Bukidnon Consumer Protection Division Chief Junar Merla nga naisyuhan ang lima ka establisemento niadtong Septiyembre tungod sa paglapas sa SRP sa pipila ka basic necessities ug prime commodities.
Matud niini, lakip sa ilang hugot nga gibantayan ang presyo sa bottled water, sardinas, gatas ug kape aron malikayan ang pagpahimulos sa mga negosyante sa mga konsumidor.
Gipalig-on usab sa DTI ang pagmonitor sa presyo ug suplay sa bottled water, kandila ug uban pang palaliton samtang nagkaduol ang pagsaulog sa Undas ug ang posibleng epekto sa El Niño.
Sa laing bahin, giawhag ni Merla ang mga konsumidor nga susihon ang presyo ug label sa mga produkto ug mosang-at og pormal nga reklamo kon adunay makitang paglapas sa mga tindahan.