Naangol ang duha ka lalaki sa managlahing insidente sa pagdunggab sa mga lungsod sa Pangantucan ug Don Carlos, Bukidnon, niadtong Oktubre 20, 2026, nga parehong naggikan sa panaglalis.
Sumala sa imbestigasyon sa kapulisan, usa ka 27-anyos nga lalaki ang gidunggab sa 36-anyos nga suspek sa Purok 2, Barangay Lantay, Pangantucan, pasado alas 1:50 sa hapon, human sa panaglalis bahin sa giabangan nga balay.
Gidunggab ang biktima sa wala nga bahin sa lawas, ubos sa ilok, apan anaa na kini sa lig-on nga kahimtang human gidala sa tambalanan, samtang giturn-over sa saksi ang suspek ngadto sa kapulisan.
Samtang, usa usab ka 52-anyos nga lalaki ang gidunggab sa tiyan sa 35-anyos nga suspek sa Purok 1, Barangay San Nicolas, Don Carlos, pasado alas 10:35 sa gabii, human sa panaglalis samtang giingong hubog ang duha.
Gidala ang biktima sa Bukidnon Provincial Hospital sa Kibawe ug gikinahanglang operahan, samtang nakaangkon usab og gamayng samad sa wala nga bukton ang suspek tungod sa pagkatigbas.
Sa laing bahin, anaa na sa kustodiya sa kapulisan ang suspek sa Don Carlos samtang padayon ang imbestigasyon alang sa posibleng pagpasaka og kaso.