Dagkong Estatwa ni King Ramses II, Nakaplagan sa Ehipto 

Nakaplagan sa mga arkeologo sa Ehipto og duha ka dagkong estatwa ni Haring Ramses II nga nag-edad og kapin 3,000 ka tuig.

Nakit-an ang maong mga artifact human nakamatikod ang usa ka lokal nga molupyo og mga kinulit nga hieroglyphs sa iyang propedad.

Ang nakalukabang mga bahin naglakip sa ulo nga nagsul-ob sa “Double Crown” ug adunay opisyal nga kinulit sa Horus name sa sikat nga pharaoh.

Gibanabana nga moabot sa kapin 7 ka metros ang gitas-on sa maong mga estatwa kun mabuo kini og balik.

Gibalhin na ang mga bahin sa estatwa ngadto sa laboratoryo aron limpyohan ug preserbahon.

Matud sa mga awtoridad, kining dakong kaplag naghatag og bag-ong kahayag sa kasaysayan ug arkitektura sa karaang Ehipto.