Nagpahimangno ang PAGASA sa posibleng kusog nga pag-ulan sa Northern Mindanao sa umaabot nga mga adlaw tungod sa posibleng epekto sa Super Typhoon Champi nga padayong gibantayan sa ahensiya.
Sa pakighinabi sa Bombo Radyo Malaybalay atol sa programang Zona Libre, gibutyag ni PAGASA-Northern Mindanao Weather Specialist Catherine T. Asunto nga posibleng makasinati og pag-ulan ang pipila ka lugar sa nasud sugod Miyerkules hangtod Biyernes.
Matod ni Asunto, nahimutang ang bagyo sa 1,525 kilometros silangan sa Southeastern Luzon, nga adunay kusog sa hangin nga 185 kilometros matag oras ug paghuros nga moabot sa 230 kilometros matag oras.
Giklaro niini nga wala pay direktang hulga sa pag-landfall sa Mindanao ang bagyo, apan posibleng makaapekto ang extension niini ug ang pagtagbo sa mga hangin sa pipila ka bahin sa nasud.
Samtang, gipatin-aw ni Asunto nga ang kasamtangang pag-ulan sa Bukidnon ug ubang bahin sa Northern Mindanao gipahinabo sa localized thunderstorms ug dili sa Intertropical Convergence Zone o ITCZ.
Gibutyag usab niini nga nagpaabot pa ang PAGASA og usa hangtod duha ka bagyo matag bulan hangtod Disyembre, samtang posible gihapong adunay bagyo nga moagi duol sa Mindanao.
Sa laing bahin, giawhag ni Asunto ang publiko nga magpabiling mabinantayon ug kanunayng mosubay sa mga weather advisory sa PAGASA aron makapangandam sa posibleng kusog nga pag-ulan.