Gikondena sa Persons with Disability Affairs Office (PDAO) sa Malaybalay City ang pagbiaybiay, ug pagpakaulaw batok sa mga tawo nga adunay kapansanan, human sa kontrobersyal nga insidente nga mikaylap sa social media.
Sa pakighinabi sa Bombo Radyo Malaybalay kang Michelle Timones, head sa PDAO-Malaybalay, nasakitan siya isip representante sa komunidad sa PWD tungod kay bisan pa sa padayong kampanya sa pagpataas sa kahibalo sa publiko, aduna gihapoy mga tawo nga nagbuhat og pagpangdaot ug pagpakaulaw sa mga adunay kapansanan.
Gipahinumdoman ni Timones nga ang Republic Act 7277, nga giusab pinaagi sa RA 9442, naghatag og proteksyon sa mga PWD batok sa diskriminasyon ug pagpakaulaw.
Matud pa niini, mahimong manubag sa balaod ang mga nalambigit, depende sa kahimtang ug sa ebidensyang mapresentar.
Giawhag usab niini ang publiko nga magmatngon sa ilang mga pulong ug lihok, ilabi na kon maghisgot bahin sa mga tawo nga adunay kapansanan, aron malikayan ang pagpangdaot ug paglapas sa ilang katungod