Gusto sa depensa ni Vice President Sara Duterte nga hatagan og higayon sa impeachment court nga makapresentar og rebuttal evidence sa mga artikulong giatras sa prosekusyon.
Matud ni Atty. Michael Wesley Poa, tigpamaba sa defense team, gusto nilang ipatin-aw ang paggamit sa confidential funds, lakip ang mga acknowledgment receipt, pirma ug ngalan ni Mary Grace Piattos nga makita sa mga gikuwestiyon nga dokumento.
Samtang, wala usab motuo si atty. Poa nga nalabwan sila sa lakang sa prosekusyon sa pag-atras sa tulo sa upat ka artikulo sa impeachment complaint.
Bisan adunay mga komplikasyon sa pagpresentar sa ebidensya, gusto niyang hatagan og higayon ang prosekusyon nga ipatin-aw ang ilang desisyon.
Kahinumduman nga kagahapong adlawa, Oktubre 13, gitugotan sa Senado isip impeachment court ang pag-atras sa Articles I, III ug IV nga may kalabotan sa giingong sayop nga paggamit sa confidential funds, bribery ug grave threats.
Nagpabilin ang Article II bahin sa giingong unexplained wealth, nga igo na sumala sa prosekusyon aron ipadayon ang kaso.