Giaprobahan na sa ikatulong pagbasa sa Sangguniang Panlungsod sa Malaybalay City ang ordinansa nga nagtumong sa paglegalisa ug pagregulasyon sa operasyon sa mga bao-bao ug motorized tricycle sa dakbayan.
Gibutyag ni City Councilor Atty. Rendon Sangalang nga unanimous o nagkahiusa ang 17 ka miyembro sa konseho sa pag-aprobar sa maong ordinansa aron mahatagan og legal nga panginabuhian ang liboan ka bao-bao operators ug drivers. Ubos sa ordinansa, gikinahanglan ang prangkisa nga mokantidad og ₱1,500 nga balido sulod sa tulo ka tuig ug special permit nga ₱500 nga kinahanglan bag-ohon matag tuig.
Gipatin-aw usab ni Sangalang nga adunay gitakdang ruta ang mga bao-bao ug gidili ang pagpamasahero sa national highway ug pagsulod sa poblacion aron malikayan ang panagbangi sa mga motorela driver ug mapahapsay ang trapiko. Samtang, multahan og ₱500 ang unang paglapas sa gitakdang ruta, samtang posibleng suspindihon o bawion ang permit ug prangkisa sa mga balik-balik nga molapas.
Sa laing bahin, giawhag ni Sangalang ang mga bao-bao operator ug driver nga sundon ang mga regulasyon sa trapiko, samtang gipaabot ang pagpirma ni City Mayor Jay Warren Pabillaran sa maong ordinansa.