Gibutyag ni Malaybalay City Councilor Jason Chad Ayala nga adunay unom hangtod walo ka barangay kapitan nga nalakip sa listahan nga iyang nadawat may kalabotan sa alegasyon sa pagpangayo og 10 porsyento gikan sa mga kontraktor sa dakbayan. Sa pakighinabi sa Bombo Radyo Malaybalay, gipatin-aw ni Ayala nga adunay kontraktor nga miduol sa iyang buhatan aron ireklamo ang maong alegasyon, apan naghulat pa siya sa mga ebidensiya sa dili pa kini ipaagi sa pormal nga imbestigasyon.
Giklaro usab sa konsehal nga ang iyang Facebook post usa lamang ka pagdapit sa mga kontraktor nga adunay reklamo ug wala kini maghingalan og bisan kinsang kapitan. Kini ang iyang tubag sa pagsaway ni Liga ng mga Barangay President ug Konsehal Julius Maghano sa maong Facebook post atol sa sesyon sa Sangguniang Panlungsod.
Matod ni Ayala, nasabtan niya ang pagpanalipod ni Maghano sa mga kapitan, apan gikinahanglan manubag ang mga opisyal sa publiko ug magpakita og transparency sa paggamit sa pondo sa barangay.
Sa laing bahin, gipasalig ni Ayala nga bisan ang iyang mga higalang kapitan dili niya protektahan kon mapamatud-ang nalambigit sa maong alegasyon, samtang giawhag ang mga kontraktor nga magpresentar og konkretong ebidensiya aron maproseso ang ilang reklamo.