Nakapasa na sa ikaduhang pagbasa sa Sangguniang Panlungsod sa Malaybalay ang gipahigayon nga ordinansa nga maghatag og regulasyon ug legalisasyon sa operasyon sa mga Bao-bao, Tricab, ug motorized tricycle sa tibuok dakbayan.
Gipangulohan ni City Councilor Atty. Rendon Sanggalang ang maong lakang diin gilatid ang pagpatuman og color coding system, limitasyon sa duha ka yunit matag tag-iya, ug ang pormal nga pag-apply sa franchise ug permit. Ubos sa maong balaodnon, gidili ang pagpasakay og labaw sa lima ka pasahero matag biyahe, ug adunay multa nga ₱500 hangtod ₱2,000 ingon man pagbawi sa permit alang sa mga makalapas o kadtong mag-operate nga walay legal nga dokumento.
Dako naman ang kalipay nga gipadayag ni Romavic Lamujer, ang presidente sa Malaybalay City Federation of Bao-bao and Tricab Operators and Drivers Association (MCFBTODA), diin iyang gilauman nga maghatag kini og mas organisado, luwas, ug legal nga panginabuhian sa mga drayber sa syudad.