Usa ka propesyonal nga stuntman gikan Slovenia ang nakarekord og Guinness World Record human makapabilin sa handstand samtang nagdilaab ang tibuok niyang lawas sulod sa 47 segundos.
Ang 35-anyos nga Filip Kržišnik, usa ka gymnast ug stunt coordinator sa industriya sa pelikula, nakab-ot ang rekord nga “longest duration full body burn handstand” atol sa record attempt sa Vienna, Austria niadtong Marso 4.
Sa maong stunt, gipabilin niini nakataas ang mga tiil samtang nagdilaab ang protective materials nga nagtabon sa iyang lawas. Human sa 47 segundos, mihunong siya ug gilayon nga gipalong sa iyang safety team ang kalayo.
Sumala sa Guinness World Records, alang lamang sa mga iladong propesyonal ang maong delikadong stunt, diin gikinahanglan ang hustong pagpangandam ug kompleto nga safety personnel.