Nakatilaw og bug-at nga kapildihan ang Gilas Pilipinas Girls sa score nga 102-47 batok sa defending champion nga Australia sa ilang unang sangka sa Division A sa FIBA U18 Women’s Asia Cup diha sa Karisma Arena sa Seremban, Malaysia.
Sayo nga gipakita sa Australian Gems ang ilang dominasyon diin nakatukod dayon sila og 30-8 nga bentaha sa unang quarter ug gipadako pa kini ngadto sa 60-20 pag-abot sa halftime. Nanguna alang sa Gilas sila si Tiffany Reyes ug Zaydhen Rosano nga parehong nakatala og tag-10 puntos, apan naglisod ang koponan sa pagpatas sa gidak-on ug kusog sa mga kaatbang.
Bisan pa man sa maong kapakyasan sa Group A, maningkamot ang Gilas Pilipinas Girls nga makabawi sa ilang mosunod nga mga sangka batok sa South Korea ug New Zealand aron magpabilin ang ilang kahigayonan sa maong kompetisyon.