Duha ka trabahante sa Nepal naluwas human sa 9 ka adlaw nga na trap sulod sa tunnel

Duha ka trabahante ang buhi nga naluwas gikan sa hydropower tunnel sa Nepal, siyam ka adlaw human sila na-trap tungod sa grabeng baha ug landslide.

Giila ang mga survivor nga sila Sanjay Sah, mechanical foreman, ug Kabir Maharjan, mechanical supervisor. Nasuta sila sulod sa tunnel sa Upper Trishuli 3A Hydropower Station sa Rasuwa District niadtong Biyernes.

Nadungog sa rescue team ang ilang tingog sulod sa tunnel, nga misangpot sa ilang malampusong pagluwas ug pagdala sa mga ospital alang sa medical treatment.

Padayon ang search and rescue operation alang sa ubang missing workers, samtang gibanabana nga hangtod 900 ka trabahante ang posibleng na-trap sa nagkalain-laing hydropower tunnels human sa kalamidad niadtong Agosto 26.