Nagpasaka og bag-ong mga kaso ang Office of the Ombudsman sa Sandiganbayan batok kang kanhi Ako Bicol Party-list Representative Zaldy Co.
Gikumpirma sa Ombudsman ang pagsang-at sa mga kaso batok sa kanhi mambabalaud, lakip ang pipila ka mga opisyal sa Department of Public Works and Highways o DPWH.
Base sa impormasyon, gisang-at sa Ombudsman ang kasong paglapas sa Section 3(e) sa Republic Act No. 3019 o Anti-Graft and Corrupt Practices Act, ug Malversation of Public Funds through Falsification of Public Documents.
Misunod ang pagsang-at sa mga kaso human matino sa Ombudsman nga adunay “probable cause” aron kasuhan ang kanhi mambabalaud ug ang uban pa.
Naggikan ang mga kaso sa giingong pagkalambigit sa mga akusado sa maanomalyang flood control project nga nagkantidad og P77 milyon sa Balagtas, Bulacan.