PANGANTUCAN, BUKIDNON — Nasikop sa mga awtoridad ang usa ka 43-anyos nga lalaki nga giila isip Top 8 Regional Priority Target o High Value Individual (HVI) sa gidiling tambal atol sa search warrant operation sa Purok 2, Barangay Malipayon, Pangantucan, Bukidnon niadtong Sabado, Agosto 29, 2026.
Subay sa report sa Bukidnon Police Provincial Office (Buk PPO), ang hiniusang operasyon sa PDEU, PIU, ug Pangantucan Police Station nag-resulta sa pagkakumpiska sa pito ka selyadong plastic sachets sa gitutohang shabu nga nagtimbang og 60.5 grams ug nagkantidad og ₱411,400. Nakit-an usab sa dapit ang mga kagamitan sa pag-amot o paggamit sa gidiling tambal sama sa weighing scale, aluminum foils, lighters, ug tooters.
Sa kasamtangan, ang suspetsado gitanggong na sa Pangantucan Municipal Police Station alang sa pagpasaka og kasong paglapas sa Sections 11 ug 12 sa Republic Act 9165, habig sa pagdala sa mga ebidensya sa Bukidnon Provincial Forensic Unit alang sa pormal nga eksaminasyon.