Girekomenda sa Office of the Ombudsman ang pagpasaka og kriminal ug administratibong kaso batok sa mga pipila ka opisyal sa DPWH ug mga personalidad nga nalambigit sa Bumitrix Development Corporation.
Nakasentro ang kaso kang kanhing Surigao del Norte representatives Francisco “Lalo” Matugas ug Francisco “Bingo” Matugas II, sa Mahayahay-Tuburan Road project sa Del Carmen, Surigao del Norte nga adunay kantidad nga kapin P80.61 milyon.
Sumala sa rekord sa DPWH, 100 porsyentong nahuman ug nabayaran na ang proyekto, apan sa inspeksyon sa Ombudsman niadtong Abril 2026, 65 hangtod 70 porsyento pa lamang ang natapos sa maong proyekto.
Matud sa Ombudsman, kapin P31 milyon ang napagawas bisan wala pa mahuman ang proyekto.
Giingong usa sa ilang gikonsiderar mao ang posibleng pinansyal nga interes sa mga kanhing kongresista sa mga kontrata nga gipondohan pinaagi sa Kongreso.
Matud pa ni Clavano, posible usab nga supak sa Konstitusyon ang pagkalambigit sa usa ka kongresista isip contractor sa proyekto nga gipondohan sa Kongreso.
Gipasabot ni Atty. Clavano nga gidili sa 1987 Constitution ang pagkalambigit sa kongresista isip contractor.
Gilakip sa mga reklamong girekomenda sa Ombudsman ang paglapas sa Section 3(e) sa Republic Act 2019 o Anti-Graft and Corrupt Practices Act, lakip ang giingong malversation of public funds pinaagi sa falsification of public documents.